ಜೋಗಿ ಕಥೆಗಳು

ಆಧುನಿಕ ಅನುಭವದ ವಿಚ್ಛಿದ್ರತೆಯನ್ನು ಪರಿಶೀಲಿಸುವ ಇಲ್ಲಿಯ ಕಥೆಗಳ ಹೊಸತನ ಮತ್ತು ಪ್ರಯೋಗಶೀಲತೆ ಒಮ್ಮೆಲೇ ಮನಸ್ಸನ್ನು ಸೆಳೆಯುತ್ತವೆ. ಕಥಾರಚನೆಯ ಮತ್ತು ಭಾಷಾ ಪ್ರಯೋಗದ ಅನೇಕ ಹೊಸ ಸಾಧ್ಯತೆಗಳು ಇಲ್ಲಿವೆ. ಹಲವು ವಾಸ್ತವಗಳು, ಹಲವು ಭ್ರಾಮಕಗಳು ಕೂಡಿ ಉಂಟಾದ ಈ ಜಗತ್ತು, ಒಂದು ಸಾಧ್ಯತೆಯಾಗಿ ನಮ್ಮೊಳಗೇ ಎಲ್ಲೋ ಅವಿತು ಕೂತಿದೆಯೇನೋ ಎಂಬ ತಲ್ಲಣವನ್ನೂ ಹುಟ್ಟಿಸುತ್ತದೆ. ಬಹು ಮುಖ್ಯವಾದುದೆಂದರೆ ಇವು ಕನ್ನಡದ ಒಳಗೇ ಹುಟ್ಟಿದ ಹೊಸ ರಚನೆಗಳು. ಹೀಗೆ ಭಾಷೆಯ ಹೊಟ್ಟೆಯಿಂದ ಬಂದ ಪ್ರಯೋಗಶೀಲತೆ ಮಾತ್ರ ಗಟ್ಟಿಯಾಗಿರುತ್ತದೆ ಹಾಗೂ ಕನ್ನಡ ಬದುಕಿನ ಹೃದಯವನ್ನು ಹಿಡಿಯಲು ಶಕ್ತವಾಗಿರುತ್ತದೆ.

ಕಿರುಗತೆಗಳಿಗೆ ಚುರುಕುತನ ಮಾತ್ರ ಇದ್ದರೆ ಸಾಲದು; ಜೊತೆಗೆ ಪರಿಣಿತ ಕಲೆಗಾರಿಕೆಯೂ ಬೇಕು. ಆ ಸಾಮರ್ಥ್ಯ ಇಲ್ಲಿಯ ಎಲ್ಲ ಕಥೆಗಳಲ್ಲೂ ಕಾಣುತ್ತದೆ. ಜೊತೆಗೆ ಕನ್ನಡ ಸಾಹಿತ್ಯ ಸ್ಮೃತಿಯಿಂದ ಹೆಕ್ಕಿದ, ಜೋಗಿಯವರಿಗೇ ವಿಶಿಷ್ಟವಾದ ಕೆಲವು ಪದ ಪ್ರಯೋಗಗಳು, ಪಾತ್ರಗಳು, ಹೆಸರುಗಳು, ಸಂದರ್ಭಗಳು ಇವೆ.

ಇವು ಆಯಾ ಕಥೆಯ ಹರವನ್ನು ಮಾತ್ರವಲ್ಲ, ಕೆಲವೊಮ್ಮೆ ಮೂಲದ ಪ್ರಸ್ತುತತೆಯನ್ನೂ ಹಿಗ್ಗಿಸುತ್ತವೆ. ಹಾಗಾಗಿ ಈ ಕಥೆಗಳ ಜೀವಜಾಲವು ಹಿಂದೆಲ್ಲೋ ಶುರುವಾಗಿ ಮುಂದೆಲ್ಲೋ ದೂರದವರೆಗೆ ಹರಡಿಕೊಂಡಿದೆ.

ವಿವೇಕ ಶಾನಭಾಗ

Explore posts in the same categories: ಅಮೃತಕ್ಕೆ ಗರುಡ